Огазе люкаськыса

17 тӧлсуре  2017-тӥ арын  Ижысь «Строитель» культурая юртын  «Вуись Выль арен» удмурт    республиканской концерт- шоу (шулдыръяськон ӝыт)  радъяськылӥз.

Городын  удмурт ёлкалы сӥзем ужрадъёс ортчыло ке но, соос бал-маскарад выллем луыло. Нош таиз  праздник кык люкетлэсь малпамын вал. Нырысетӥез шулдыръськон сцена вылын концертэн, серемес учыръёсын, учкисьёсын шудыса ортчиз, кыкетӥез — фойэын.  Концертын Выль арлы  сӥзем кырӟанъёслы, кылбуръёслы, дӥсьёслы ӵошатскон  ялэмын вал.  Ёросъёсысь но Ижкарысь артистъёсъёс выль кырӟанъёсынызы учкисьёсыз туж шумпотӥзы. Таӵе ужрадэз ӟуч сямен мон «Нововведение» шуысал.  Чебер кырӟаменызы висъяськизы  Кияса ёросысь  Вуж Салья гуртысь «Бӧляк» но  Ижкарысь Культурая колледжысь «Инву гур» калык ансамбльёс.  Нимаз  но ӵошен кырӟасьёс пӧлысь  Любовь Якимова (Кузьмина) но Алина Пислегова. Соос быдэстӥзы Светлана Кузьминалэсь «Тол» кырзанзэ.  Алнаш черко гуртысь Любовь Васильевалэн  «Выль арен ӟечкыласько» но «Шулдыртомы» туала эстрадалы тупась кырӟанъёсыз эшшо но чебертӥзы та ӝытэз. Удмуртиысь культура удысысь сиё-дано ужасьёс Юлия но Виталий Кузьминъёс лирической но эстрадая кырӟанъёсын  учкисьёслэсь сюлэмъёссэс вырзытӥзы. Элькунысь сиё-дано журналист, писатель Владимир Михайлов. паймымон  серемес учыръёссэ лыдӟемез  сяна, маскаръяськиз но.  Валамон ини, таосыз артистъёс тодмо професссионалъёс, шуыса. Аслаз «Выль армы» кырӟанэныз  Майя Митрофанова но висъяськиз.  Завьял ёросысь Вуж Мартьян гуртысь, «Инзы» фольклор коллективез тодисьтэмез ик овол, дыр, ни. Соос калык куспо фестивальёсын Гран-приос утылэмын.  Ува ёросысь Узей-Тукля гуртысь «Туклячи» ансамбль калык инструментъёсын шудэмъя кырӟаменызы учкисьёсты  паймытӥз. Нош  Ижкарысь  «Спартак» културая юртысь «Задор мылкыд»  коллектив  задор но капчи луэмзэс «Вунэтӥд ке, монэ» (крезьгурез Геннадий Волковлэн) кырӟанэн мылкыдэз ӝутӥзы. Кырӟанъёс, эктонъёс вискын, я Сильтӧл кышкатыса, маскаен потэ, я пуны утэм кура сцена сьӧрын кылӥське. Озьы шуак шӧдтэк шорысь маскаръяськонъёсын, учкисьёсын шудыса концерт мынӥз.   Кырӟасьёсыз но эктӥсьёсыз шуныт кичабоъёсын  пумитазы.  Нош кӧня зучъёс  лыктиллям!  Кин  удмуртлыкез  яратэ, со валаз,  ӝыт зэмос удмурт ёлкалы пӧрмиз.   Ватсаме потэ на, Выль арлы  вурем дӥсъёсын  висъяськизы Ижысь  Устинов ёросысь Нылпи творчествоя юыртысь, Кияса  но Алнаш ёросъёсысь пыриськемъёс. Сцена вылын ик Тол бабаен но Лымы нылэн пумиськон кылдӥз. Соос пырон билетъёсъя саламъёс дасяллям. Котькуд радын сямен  шудо пус усемлы, учкисьёс  коньдон но пӧртэм кузьымъёс утылӥзы. Залын инты ӧз тырмы, пуконъёсын но пукылӥзы. Ужрад  бере   ӵошатсконъёсын вормисьёслы но пыриськемъёслы  дипломъёс  сётъязы.

Кыкетӥ люкетэз бал- маскарад  фойеын ӝӧквыл тыр сиёнэн, арган шудэмъя шулдыр эктонъёсын азланьтӥськиз. Ансамбльёс огзы бӧрсьы огзы  кырӟаса ӵошатскизы на. Ваньзылы  озьы ик кузьымъёс дасямын вылэм. Ӵошатсконъёсы пыриськись учкисьёс но саламъёс басьтылӥзы. Таӵе ужрадын удмурт калык но мукет выжыосмы но матэгес тодматско, асьсэ тодонлыкенызы вошъясько.  Эктэмъя эктэм потэ, кырӟамъя, кырӟам потэ, вуоно арын но витиськомы таӵе эшлыко чебер ужрад отрчытыны, шуылӥзы балэ кылемъёс.

Та проектэз  кылбурчи, крезьгурчи, кырӟась, Россиысь писательёслэн огазеяськонзылэн езчиез, Удмуртиысь культура удысысь сиё-дано ужась Юлия Кузьмина малпам. Со «Инвожо» журналын ужа бере,  журналэз, егитъёсыз  но выль  кырӟанъёсыз  калыке паськытгес вӧлмытон  вылысь кичӧлтонэныз вазиське  журналлэн валтӥсь редакторезлы, Удмуртиысь писательёслэн  огазеяськонзылэн Тӧроезлы Пётр Захаровлы но  Удмуртиысь крезьгурчиослэн огазеяськонзылэн Тӧроезлы Марина Ходыревалы.  Огкыл шедьтыса, огазе люкаськыса,  ужрад  но капчигес но ӟечгес пӧрме вылэм.  Вуэм Выль арен, эшъёс! Эшшо но  чебересь выль кырӟанъёс  мед вордскозы но чузъяськозы  крезьгуро шаерамы.

Э. Чекина (Ижкарын улись).

DSC_0003

DSC_0005

DSC_0030

DSC_0148

DSC_0237

DSC_0245

DSC_0285